七．一, 二 之 澳門遊

七．一, 我地無去遊行, 反而走左去澳門窩!
晨早7:30, 我地一行四人 (Alvin, 我, Kingsley, Will) 0係中港碼頭集合. 嘩! 好多人呀! 可能大家都襯住假期返大陸玩啦~ 真係人頭踴踴呀~!

上船喇~ *新渡輪0的位都幾舒服架窩! 我可以訓左兩覺呀! 不過應該只係去澳門0個程0的位先甘舒服, 因為我地回程既時候, 0的位又變返細細張lu...

(第1站)
一到步, 我地就即刻坐 3號 bus 去新馬路 搵0個間叫做 "三元粥品" 既粥舖食早餐啦. 點知......只係推開半度門, 裡面位老闆娘就話 : "唔好意思呀, 我地0的粥今日賣晒喇!"

下???? 只不過係 10:30am 咋窩... 甘快就賣晒0的粥??? 唔通0的粥真係好食得甘厲害...?
無辦法啦... 我地唯有一邊行, 一邊睇下邊度有餐廳囉. 卒之去左一間叫做 "勝利茶餐廳" . 3個早餐A, 1個早餐C ! 阿Will 既沙嗲牛肉湯麵既沙嗲湯底唔錯呀! 好味!



(第2站)











早餐後, 我地就坐 33號 bus 返酒店喇. (我地住 新世紀酒店@氹仔) 不過因為要 2:00pm 先可以 check-in, 所以我地就去左附近既 葡式住宅博物館 -- 龍環葡韻.
入場費: $5
有三間屋 (館)俾你睇. 不過其實除左第1間屋, 有0的傢俱擺設睇下之外, 其他0個兩間都無乜野好睇架喇. 得0的服飾呀, 生計工具呀甘...無乜特別架咋. 不過 $5 甘平, 就算數啦~
***順帶一提. 第1間屋(館) 0個度有位 "食蕉"叔叔, 好鬼惡呀! 唔可以大力行樓梯, 唔可以坐0個0的凳, 不過0個0的凳無野欄住, 你會以為係俾你坐黎影下相甘囉.... (一_一"")
如果你唔小心犯以上錯誤, 食蕉叔叔就會好惡甘喝你架喇!

呢個博物館前面有個荷花塘. 我地見到都起勢甘影相! 都消磨左唔少時間喔!


(第3站)





官也街就0係龍環葡韻博物館附近, 甘所以我地就選擇行路過去喇.
點知...俾個map 呃左, 攪到我地行左好多冤枉路呀~~~

官也街呢, 其實係一條賣手信既街黎既. 裡面有 :
車里哥夫, 莫義記大菜糕....等等

我地既lunch就係0係官也街裡面既 公雞葡國餐廳 攪掂喇.
因為大家都唔係好肚餓, 所以我地4個人只叫左少少野share黎食.
有
1. 鹹豬手檸檬汁沙律
2. 串燒

甜品: 1. 唔知0羊味既脆脆雪糕.
* 雖然係唔知0羊味, 不過真係好香好好味窩!
2. 芒果布丁
* 我覺得我整得好味過佢好多~~~ 佢既口感有0的似大菜糕...

服務唔錯, 雖然我地只係叫左甘少野食, 但係佢地都無面 火農. 反而好helpful添.
我地問路呀, 問邊間野係邊樹...etc, 佢都好樂意答我地窩~ 抵讚!

食完個lunch, 行出餐廳見到對面就係 莫義記大菜糕, 甘當然我又要試下睇下係咪真係甘得啦!!
我試左個 冰涼大菜糕. 望落個樣無乜特別, 同普通大菜糕一樣. 不過一放入口~~~不得了嚕...好薄荷呀!! 仲勁過 Airwave 爽浪 香口膠呀!
其實大菜糕仲有好多其他味道, 例如: 士多啤梨味, 雜果味...etc 好多顏色~ 大家如果有機會去既, 都可以一試既.


差唔多夠鐘返酒店check-in喇! 點知一入到酒店就發現好大條人龍! 原來大家都係排隊check-in架!
2:00pm先可以check-in 呢個規例實在太低B喇!!!

(第4站)





放低0的行李之後, 我地就出動去 澳門觀光塔.
澳門觀光塔高 61層, 338米高. 坐lift的話, 每秒可升5層樓高. 所以只須約15秒就可以上到塔頂喇.
58樓 係室內觀景台. 某部份地下用強化玻璃做成, 企0係上面望落去地下, 真係會腳仔軟架! 好驚架...!!

觀光塔另外有個玩意, 就係俾百幾蚊著上特別既安全衫, 出去塔外 (61樓) 行一個圈!
當日岩岩落完大雨, 但係我地都見到有對情侶玩窩! 我真係鄧佢地驚呀! 外面甘濕, 萬一"線"腳... 好恐怖呀!!


(第5站)






行完觀光塔之後, 我地就出發去 賽車博物館 + 葡萄酒博物館 喇. 途經 盛世蓮花. 影左幾張相! (果然係旅客!! 哈哈~)
入場費: $20 兩個館

基本上係冇乜特別野睇既.
賽車博物館有0的賽車, 老爺車, 電單車, 同埋澳門既賽車跑道.
葡萄酒博物館 - 一入到去就請你每人一杯 Fruity紅酒/Dry紅酒/白酒/冰酒. 味道... 唔駛錢, 你話會有幾好飲?
館裡面有0的著住唔同服飾既假人. (悶) 行入0的, 就有假既酒窖, 裡面裝左0的封晒塵既葡萄酒 (唔知真定假既...), 同埋有0的整葡萄酒用既工具.
仲有仲有, 就係假既葡萄! 不過 Kingsley 話佢地好真! 哈~~


(第6站)
大家都聽聞金沙賭場既自助餐好正, 好多野食. 甘我地又點可以錯過呢? Heehee~ XD
因為賭場內係禁止影相既, 所以影唔到相俾大家睇lu...

又聽聞金沙賭場食自助餐係要大排長龍既, 所以我地一入到去第一件事就係衝上2樓霸頭位~!! (聽起上黎都幾老土!)

自助餐由 5:30pm 開始. 先付費, 後入坐. (驚我地食霸王餐?!)
價錢: $228/1位
食物真係種類繁多, 多不乘數!
- 冷盤有20-30多款. 包括生蠔, 凍肉0者哩, 煙三文魚, 煙吞拿魚, 各款沙律, ham...etc.
生蠔係即開既! 隻隻都肥0都0都! 好好味呀! 我食左7隻甘多~ 好美味呀~~~ 好滿足~~~~
- 湯有4-5款. 其中一款係人參煲雞湯!
- 中式食物有 點心, e.g: 小籠包, 蝦餃, 燒賣...etc. 亦有各款其他菜色, 當中既片皮鴨都唔錯. 可惜係冇京荵, 如果唔係就perfect喇!
另外仲有即煮既粉, 麵, 粥...
- 有印度食物, e.g 各款咖哩, Naan...
- 西餐當然唔小得! 有燒牛肉 (略嫌un左0的), 扒類, 意粉... etc
- 甜品勁多種類! 有一個 Chocolate Foundue, 好以點 Marshmelow, 蜜瓜, puff... 不過係冇strawberry! (攪錯呀...!) 蛋糕乜款都有, 雪糕有6款. 可以加埋topping添!

總之呢, 如果你食得晒所有既野呢, 你個肚都應該差唔多爆架喇!!!

我地食飽飽之後就當然要落賭場玩下啦! 首先去睇下人地玩大細, 百家樂, 俄羅斯輪盤...etc.
跟住就去玩老虎機喇. Kingsley 掉左 $300落老虎機俾老虎食左! 阿Will就掉 $100, 但係老虎嘔返 $135俾佢窩!
差不多走既時候, 我地見到有張百家樂枱被人群包圍住. 原來係連開左廿多舖閒, 煲爆左個莊!! 如果我地都加入埋一份, 甘就發囉~~~!!!


(第7站)







食飽就去散下步啦! 我地返左去新馬路 既 議事亭前地 同 板樟堂街 0個度行下喇.
夜晚既議事亭前地都幾靚架. 柔和既燈光 加上古色古香既建築物, 同日頭既時候對比係另有一番風味!

行左一陣, 又係時候去食宵夜喇! 哈哈~ 我地呢個係為食團嘛, 當然要食過夠本啦!
宵夜係 義順 既 雙皮奶 及 紅豆雙皮奶. 雙皮奶真係好滑好滑呀! 比香港既義順雙皮奶滑不知幾多倍! Kingsley 一個人就可以食兩碗喇! 佢之前仲話好飽架窩! 由此可知真係好好味啦!

(第8站)
有澳門蘭桂坊之稱既 南灣湖區, 實在係冇0羊特別! 亦絕對唔能夠同香港既蘭桂坊相提並論! 去見識下就算喇. 冇入去0的酒吧坐...

11點幾鍾, 大家都覺有0的 支力 喇, 所以就返酒店休息下lu.
沖完涼之後, 我同Honey落左去酒店既賭場見識下. 不過唔知係咪因為已經去過金沙, 所以相比下, 我地酒店呢個希臘神話娛樂城就較為遜色喇.


第二日, 2/7行程

(第1站)

因為之前0個日既早餐食唔到三元粥品, 我地今次晨早起身第1件事就係打電話去粥舖叫佢留返4碗粥比我地! 今次我地 9:30am 去到, 終於都可以一試呢度既肉丸粥喇! 果然冇辜負我地晨早起身既精神, 呢度既粥果然係好好味! 同其他粥舖既粥好唔同. 佢地既粥係煲到好棉好棉, 味道調校得岩岩好. 粥底有一隻蛋, 了混之後碗粥變成黃色, 多一份蛋味, 更吸引! 肉丸係即叫即整既. 即係一大盤肉, 有人order既時候先會整成肉丸! 味道唔錯架. 好新鮮~
終於明白點解佢地既粥可以0係短時間內賣完~ 哈~~ 食完之後有種滿足既感覺~

(第2站)



襯早又好太陽, 我地背住重重既背囊都要出發上大三巴~! (順路又慳時間)
估唔到早上都擠滿遊人~~果然係旅遊點!
大三巴旁有個哪0宅廟. 其實都冇0羊好睇, 不過我地都順便去望下啦.
跟住又好笨笨甘行斜路上去舊城牆睇砲台. 點解我話笨笨呢? 因為當我地行到上去先發現原來係有電梯上去架~~~~~!!!! 哇哈哈哈哈~~~ 攪到我地個個行到又熱又 支力~ 真係攪笑~ XD

(第3站)


行返落板樟堂前地途經 聖母玫瑰堂, 我地又走入去八下~
之後去左 西灣安記 食豬扒飽. 當大家都食豬扒包既時候, 我就食 辣魚包~ 因為我一向對豬扒包實在不大興趣~ 可惜呢間 西灣安記 既豬扒包同辣魚包都冇網友講既甘好味... 有0的失望呀~

(第4站)


因為唔想整日都背著重重既背囊, 所以我地就走去金沙借佢地個寄存處用下啦. 順便借埋個washroom用下添啦~ heehee~ lol
其實都唔係肚餓既, 但係為左符合我地呢個為食團既宗旨, 所以就算唔肚餓, 我地都要去食好味道!
今次我地去左 賽車看台0個度間 比薩薄餅店 食Pizza! (途中又行左不少冤枉路...都怪我不好~~~ :P)
因為唔餓既關係, 我地只order左一個細既 Parma Pizza 同 一個 三文魚片檸檬Salad.
後來真係後悔只order左細既 Parma Pizza, 因為實在太好味喇! 相信就算肚飽你都可以食到兩塊!

(第5站)



食食食, 繼續食!! 食完lunch當然要食甜品!
我地再專程坐小巴到 荷蘭園大馬路 既 禮記雪糕 食雪糕做甜品~
(小巴真係帶你遊花園甘周圍兜~ 差不多要半個鐘先到~! 我都訓左幾覺lu! )
禮記係一間有60多年歷史既老舖. 雪糕包裝仍保留舊貌, 非常懷舊feel架~!
我試左個紅豆雪條, Honey就要香芋雪糕, 阿Will 要 Vanilla 同香芋雪糕 + ice cream sandwiches, Kingsley又係 Vanilla味~
紅豆雪條有好多紅豆~ 而且仲有種 "家的味道", 好似細個媽咪煲紅豆沙整雪條既味道甘~ 香芋雪糕並唔係平時見到既紫色, 而係白色既! 裡面有芋頭茸, 好明顯係真材實料所製, 並非色素也!! 真係好香, 好好味~
至於Vanilla味我就冇試喇. 不過見到顏色頗黃, 知道佢一定落左好多蛋黃黎整~
對於呢間老舖既雪糕, 我真係幾滿意呀. 比起甚麼 Häagen-Dazs, 禮記雪糕好似多一份homemade feel!

(第6站)
食得飽飽地, 我地就走去行下街, 行下公園啦. 去左 盧廉若花園. 地方唔算大, 有花有樹有池塘, 所以都頗多蚊! 因為唔想餵蚊, 所以我地只係逗留短時間就走lu.

(第7站)



消化左少少, 個胃又有少少空位, 甘緊係又要再去搵野食啦~
今次我地黎到 馬統領街, 試試 瑪嘉烈 既葡撻!
又係一個迫滿人既地方! 相信都係一個景點黎架喇~!
講真, 葡撻完全係靠佢夠熱, 個皮夠酥, 蛋夠燶先好味! 好彩呢度都做得到! 可惜個奶茶真係唔得!
唔夠凍又苦~! 扣分!

(第8站)

旅程差不多完結喇, 都係時候去買返0的手信喇!
我地又返到 議事亭 附近既 清平直街 選購手信啦~ 呢度有好多大大小小既手信鋪, 可以話全部同食有關! 雖然話唔買甘多, 但我都買左3大袋!
首先係去 名家手信 買左0的杏仁餅, 脆脆豬肉乾, 同埋 三千年開花三千年結果既王母番桃!
然後就去 咀香園 買紫菜肉鬆鳳皇卷. 我地幾個夾夾埋埋買左成十幾盒呀!! 阿Will仲買左雲片糕添呀! 雲片糕係我細個既時候其中一款最鍾意既食物黎架~!
最後就係去 鉅記 買花生糖喇!
哈哈, 真係滿載而歸呀!

(第9站)





晚飯時候! 原本想去 九如坊 食葡菜既, 點知我地 5:30去到, 佢已經話full house喇! 但係0個時間餐廳仲係好吉架窩!
算啦, 甘我地就由 Kingsley發板, 去 龍記酒家 食魚翅喇!
聽Kingsley講話唔錯架!
我地order左 白焯中蝦, 雞燉翅, 乳鴿, 同埋菜菜. 雞燉翅果然唔錯呀~ 好鮮味!
乳鴿都幾好味~ 中蝦差0的食唔晒添!
食左甘多野先每人百鬆0的蚊! 算抵啦~


真係夕陽無限好, 只是近黃昏! 黎到呢度, 旅程要完結喇.
我地返去金沙pick up返0的行裝, 就去碼頭上船喇~
雖然今次旅程由8人減到得返我地4個人, 但係都好開心丫. 全程大家都好融合, 冇話意見分歧甘, 真係好難得呀~!
希望以後再有機會可以一齊去旅行一齊玩啦~